Паччöр

            ПАЧЧÖР

Биасьӧ ывлаын кыа,

Синсӧ пӧдлалӧ нин коми сикт,

Чомйын крукыльöн пон олö-вылö,

Паччӧр вылын шоныд на дзик.

Пӧчыс висьталӧ важ гусяторъяс,

Кывзö нывка, но полiгтыр,

Ӧшинь сайын турӧба войыс,

Еджыд лымчиръяс бергӧдлас дыр.

Пӧльыштiс пöчыс сiсь вылӧ:

«Вод нин, войшöрыс матыстчö тай».

Ачыс петiс мöд жырйö, эз ылö,

И шуштӧмлöн лои кад пай.

Шебрасысь оз пет ныв, полӧ,

Друг трачнитiс пач улын пöв.

Вомгор унаысь кевмöмöн корӧ,

Пӧчыс узьӧ да нинöм оз кыв,

Юрӧдз дзебсьӧ, но ылöдлö полöм.

Керка пельӧсын лӧзӧват би,

Тöдтöм югöрнас ас дорас корö.

Лёкысь дзуртыштöм кöдзöдiс вир.

Ӧшинь куричыс, кӧдзыдысь вöрö,

Керка сыркмунлö, ветлöдлö скач,

Гашкö тöвнырысь öдзӧс вуг дзöрö,

Да гольöдчö пач пытшкын рач.

Мортлöн вуджöртöр веськалiс жырйӧ,

Джоджыс ветлöмсыс ньöти эз дзурт.

А мыгӧрыс тӧдсалöн быттьӧ,

Весиг пон сылы воча эз увт.

Шебрас улын асылöдз овсьыс,

Гашкö вöт вöлi? Вуджöр эз лок.

Руа ӧшиньты кельыд би ловзьö,

Сöмын пöч дорö пыравлiс Орт.