Олöм

СУНИС

Му пуксьöмсянь уна лун чöж

Еджыд черань кыö сьöд вез.

Сунис кыссьö и му гöгöр гартчö

Некор оз ор.

Ема сунисöн öлöмсö вурö,

Öта-мöд дорас йитö бур кад,

Прöшвиысь аддзö мортлысь олöм

Да гуся мöвп.

Олöмлысь печкан ас дорас кутö,

Тупыльысь оз торъяв ни öти шöрт.

Чöрссö бергöдлö да гартлö,

Лоас-ö тöлк?

                        ***

Быттьö личкö му вылö сьöд олöм,

Шöпкö ассьыс повзьöдлана кыв.

Нора корö отсавны. И бöрдöм..

Мый нö вермас вöчны ичöт ныв?

Енэж кодь лöз синъяснас му вылö

Видзöдö и аддзö мугов рöм.

Пельсö тупкö, но и юрас кылö

Олöмлысь лёк чирзöмсö. И кöн..

Кöнi олам ми, ог гöгöрвоöй ассьным,

Тупкам синъяс, и нинöм оз пель кыв.

Мыйла кылö олöм шы и аддзö,

Енэж кодь лöз синма ичöт ныв? 

                    ***

Мый аски лоас – ме ог тöд.

Гашкö воссяс олöм мöд?

Гашкö му шарыс бергöдчас мöдарö?

Мый та йылысь тöдан тэ?

Олöмлы паныд ме бара сулала  -

Ассьым выль туй öнi нуöда.

Гашкö вешъян тэ татысь мöдарö,

Мыйла татшöм туйыс колö тэд?

                     ***

Лэпты синъястö лöзöват енэжас,

Казяв кодзувлысь кельыд на би.

Мöвпышт, кодi тэ тайö олöмас,

И мыйла пыр олам на ми?

Пуксьы аслад ю берег вылö,

Аддзы, мый вайö ас пытшкас ю.

Тöдмав, мый сьöлöмад öнöдз на кылö,

Мый олöмсьыд некор оз вун.

Бергöдчи бöрö да олöмтö аддзи,

И син водзад лэбас быд здук.
Лекыс кор унаысь дзебсьö бур сайö 
А таын-ö шуд?

ВИТРАЖ

Олöм петкöдлас и выль и важ

Уна рöма стеклöа витраж.

Шондi югöр петас кор

Уна стеклöяслöн сор

Джоджö лöсьöдасны серпас,
Кодöс аддзыны он вермы.