26 января 2018 г.

Япония. Мифология

           ***
Чуймöдана, аслыспöлöс
Асыввывса тöлысь,
Ыджыд синнас югзьöдöма
Мулысь ичöт нöрыс.
Важöн казялöмась йöзыс
Тöлысьлöн бан бокын
Овмöдчöмась – кутчысьöмась
Кöчьяслöн руд котыр.
Лунтыр чукöртöны турун,
Медым артмас инас,
Босьтас висьöм, сетас долыд
Югöрыс кор инмас.


26 декабря 2017 г.

Басня

ЗЕП

Öтчыд Ручлы вöрын сюрис
Кольöм кодöнкö пальто,
Бергöдлiс да öзйис юрын
Сёян нажöвитан мöвп.

Дзебис ассьыс аддзöмторсö,
Кутö юрын ыджыд дум,
Аддзö кöчьяс чукöртöны
Сьылöмсорöн воöм гум.

Шуö Ручыд: «Дона кöчьяс,
Менам эм зэв чуймантор,
Сэтчö кымын кöть эн сюяв,
Тöрас ставыс да оз пот».

- Ме ог эскы тэныд, - нора
Кöчыд шуис полiгтыр,
- Локтöй аски тi эрд вылö,
Вайöй сёян мешöк тыр.

Ачыс кöтöрöн эрд вылö,
Кодйыс войбыд ыджыд гу,
Сэсся пуксис рой мыр вылö,
Пальто бöждор дзебис му.

Кöчьяс локтöны, ас кежыс
Босьтöмаöсь ыджыд ноп,
Ручыд шуö: «Мыччöй меным,
Медводз медся чöскыд гоб».

Босьтiс ручыд, сюйис зептас
Öти гоб, сы бöрся мöд,
Сэсся коймöд, нёльöд, витöд,
Ставыс тöрö, зеп оз пот.

Кöчьяс шензьöны, оз тöдны,
Мый став сёян зеп рузь пыр,
Усьö войын кодйöм гуö,
Гусö дзебö роймöм мыр.

Заптöм сёян ставнас быри,
Ручыд шуö: «Сёян - дон».
Кöчьяс мунiсы шог сорöн,
Выльпöв йöйтöдлöм оз ков.

Бура тыртiс гусö корйöн,
Гортас котöртiс радпыр,
Асывнас, кор локтiс аддзис,
Важ пу усьöма гу выв.

Коли Ручыд тшыгйöн лача,
Видлiс, но эз сетчы пу.
Рузя зептад öд он ачыд,
Бöръя кынöмпöттö сюй.





1 декабря 2017 г.

Япония. Мифология

      ВЫЛЬ ВО НИМ 

Енсар коркö олан инö
Корис локны аслас вынöн,
Стöча квайт час асыв кежлö,
Шондi асывсö кор едждö, -

Дас кык пемöс нимöн кöсйöм,
Юкны олан кадпас вöзйö,
Ыстiс муö ыджыд горöн,
Медводз Шырпи кылiс корöм, -

"Сöмын вермасны, кыдз овлö,
Найö, кодъя мичлун дорö,
Статьöн чуймöдасны менö,
Сямöн, кужöмöн да вемöн".

Мунö Шыр му кузя, корсьö,
Кодi сыкöд каяс орччöн,
Регыд мыччысисны Öш,
Вöрын - Тигр, а сэсся Кöч,

Вылын лэбалысь Дракон,
Мудер Кый, видз вылын Вöв,
Баля, ÖбезьянаПетук,
Медбöр Пон, но нöшта öтик,

Каньыд рад, но узьны кöсйö,
Сiйöс садьмöдны водз вöзйö,
Сылы чöскыд локтö вöт -
Шыр нин важöн содтiс öд,

А кор садьмис - гöгöр югыд,
Гöра йылö каис здукöн.
Сёр нин вöлi, Порсьпи тан,
Эз коль сылы волöн пай.

Мед эз шогсьы Каньыд нора
Порсьпи джынъявны во корö.
Ставöн чайтöны, та бöрын,
Шырыд каньысь ёна полö.



22 ноября 2017 г.

Япония. Мифология


            ЯМАУБА[1]

Олö вöрын Ямауба,  
Сылысь ловсö дзоридз кутö,
Черсö мырö сатшкас "клён",
Вошысьлы мед оз во пом.

Ассьыс турунъяссö вежö, 
Кöть и йöзысь бокö кежö.
Весиг пиыс медся ён[2],
Нипон муын тöдса зон.

Кодкö аддзö зэв лёк руöн,
Кодкö бурöн сiйöс шуö,
Коркö пöрысь, коркö том,
Пельсянь пельöдз жаба вом.




[1] Яп. Ёма;
[2] Кинтаро вöлi весиг ичöтдырйи богатырöн.


5 ноября 2017 г.

***
Эн паныд сувт тэ кöдзыд воöмлы,
Мед ваяс ассьыс гусятор,
Мед ыркыд сынöдыс оз ылöдлы,
Оз веськав синмад йиысь сор.

Быд ловö сiйö кужö пыравны
Да аддзö сэтысь колан кыв,
Öд сьöлöмкöд тшöтш найö сыласны,
Кор кутас сывны еджыд лым.



25 октября 2017 г.

***
Шулiсны, мый арся войö
Кодзувъяс кутасны усьласьны.
Öтласисны тöвру сорöн, 
Чужöмсö ассьыс эз мыччöдны.
Дзебисны гусятор сойö,
Мöвпъяссö кымöрöн вевттисны.
Му вылын гылалöм торöн
Ёнджыка югъявны вермасны.


18 октября 2017 г.

....

          
           куття   

Вежа пӧра, рӧмыд ывла
Йизьӧм веркӧс гыӧр пыр,
Лимзалӧ кор тӧвру вына,
Ваысь мыччöдлöны юр,

Кӧдзыд тӧвру чужӧм сотӧ,
Вурун кепысь ки оз видз,
Мунӧ сиктын ыджыд ӧдӧн
Куттяяслӧн пемыд визь.

Ӧти наысь кежис бокӧ
Гӧгӧр вежис вуджӧр бок.
Котравсьӧма. Бара водзӧ -
Оз вӧй лымӧ гынзьӧм кок.

Повзьӧдлӧны челядь котыр,
Мед оз ворсны талун дыр:
«Кыа бöрын  выныс содӧ,
Куття киыд кыскас пыр».

Пакӧститны быдтор шогмас:
Усяс пу, кор воссяс вад,
Ӧд эз ачыс бӧрйы овны
Медся кӧдзыд волысь кад.

Бӧжнас туйяс тыртас лымӧн -
Коляс йӧзлы уна нок,
Мӧд во кежлӧдз нуас аскӧд
Даддьӧ пуктӧм куття рок.