Япония. Мифология.

         

    

      ВЫЛЬ ВО НИМ 

Енсар коркö олан инö

Корис локны аслас вынöн,

Стöча квайт час асыв кежлö

Шондi асывсö кор едждö, -

Дас кык пемöс нимöн кöсйöм,

Юкны олан кадпас вöзйö,

Ыстiс муö ыджыд горöн,

Медводз Шырпи кылiс корöм, -

"Сöмын вермасны, кыдз овлö,

Найö, кодъя мичлун дорö,

Статьöн чуймöдасны менö,

Сямöн, кужöмöн да вемöн".

Мунö Шыр му кузя, корсьö,

Кодi сыкöд каяс орччöн,

Регыд мыччысисны Öш,

Вöрын - Тигр, а сэсся Кöч,

Вылын лэбалысь Дракон,

Мудер Кый, видз вылын Вöв,

Баля, Öбезьяна, Петук,

Медбöр Пон, но нöшта öтик,

Каньыд рад, но узьны кöсйö,

Сiйöс садьмöдны водз вöзйö,

Сылы чöскыд локтö вöт -

Шыр нин важöн содтiс öд,

А кор садьмис - гöгöр югыд,

Гöра йылö каис здукöн.

Сёр нин вöлi, Порсьпи тан,

Эз коль сылы волöн пай.

Мед эз шогсьы Каньыд нора

Порсьпи джынъявны во корö.

Ставöн чайтöны, та бöрын,

Шырыд каньысь ёна полö.

       ЯМАУБА[1]

Олö вöрын Ямауба,  

Сылысь ловсö дзоридз кутö,

Черсö мырö сатшкас "клён",

Вошысьлы мед оз во пом.

Ассьыс турунъяссö вежö, 

Кöть и йöзысь бокö кежö.

Весиг пиыс медся ён[2],

Нипон муын тöдса зон.

Кодкö аддзö зэв лёк руöн,

Кодкö бурöн сiйöс шуö,

Коркö пöрысь, коркö том,

Пельсянь пельöдз жаба вом.

---

[1] Яп. Ёма;

[2] Кинтаро вöлi весиг ичöтдырйи богатырöн.

ХИКОБОСИ ДА ОРИХИМЭ

(Танабата легенда)

Енэж ю кор вöлi катö,

Олiсны сэк важся кадö

Хикобóси – зон, да ныв Орихимэ,

Тöдан на йылысь легенда тэ?

Мича ныв крут берег вылын

Лун и вой пыр дöра кыö.

Пастук зон эз тöдлы тшöт

Кымын сылöн видзан скöт.

Нывлöн батьыс Енсар Тэнко,

Аддзö нывыс быдмис, тöлка,

Сiдзкö колö сылы пов.

Тадзи пандасис кык лов.

Радейтöмыс налöн ылö

Нуö быттьö бордъяс вылын,

Вунöдiсны став удж йывсьыс.

Тайö нывлöн батьлы кывсис.

Дöзмис сэки вына батьыс,

Шуис: - «Овны тадз оз статьыт!

Юöн торйöдны ме вöзъя».

Пыр жö öтлан эз ло гозъя.

Нывлöн бöрдöм ылöдз кылö,

Лун-вой дöрасö пыр кыö.

Зоныс жугыль, оз лок вöт,

Пемыд войöдз видзö скöт.

Тэнко жальмис, öти войö

Лэдзис мунны верöс дорö.
Ставлы лои тöдчан  лун,

Енныв радпыр вуджис ю,

Сiйö кадсянь, гожся войö,

Кодзув югöрсö пыр койö,

Сылы воча кодзув мöд

Ыстö ассьыс гуся вöт.

ЦУРУ[1]

Йöктö да тöврукöд ворсö,

Тöдö став дзоридзсö, корсö,

Гöрд беддьöн кутöма юрси,

Йöз пиын бура на овсис.

Видзöдö, сералö-котсö,

Мыччöдлö ассьыс кузь коксö,

Паськöмыс му вылö уси,

Кор шондi кыр сайö пуксис.

Кияссö веськöдiс бокö,

Сöмын мед тэнö оз кокав,

Енэжын выль паськöм сюри -

Бордъяссö восьтыс руд тури.

---

[1]  журавли – оборотни, очень редко превращаются в людей, в человеческом облике - очень добрые, милые, красивые существа со всепонимающим взглядом.

HONE-ONNA[1]

Важ кодьыс жö мича бана,

Еджыд киас кутö хиганбана,

Ачыс рад, и верöс сыкöд тшöтш.

Гашкö кулöм эз вöв стöч?

Тöдлiс сiйö радейтöмлысь дой

Сэк ловзис войын гуса шой.

Сöмын радейтöмöн эн кö висьлы,

Аддзан сылысь косьмöм лысьöм.

Став олöм ловсö мортлысь юас,

Аскöдыс тшöтш  регыд  гуас нуас.

Аски бара локтас гöтыр дона,

Тадзи  «ворсö» Хонэ-Онна.

---

[1] призрак умершей женщины, чья любовь так велика, что не дает спокойно лежать в могиле. На самом деле она — гниющий труп или даже скелет, но чары позволяют

ей выглядеть обольстительной красавицей.